মন রিবাঙত্তুন উদি এজের

প্রকাশিত: ২:০০ অপরাহ্ণ , জানুয়ারি ১৭, ২০২১
প্রিয়দর্শী চাকমা
সেদিন্যা জারহাল্যা বেলান উদিবার আগে জোয়ার হুমি যিয়ে বঙ্গোপ সাগরত মুধ্যা যেইনায় আদিলঙ দ্বিজনে হোরোলি চরর পর হোরোলি চর মনত আগেনি তর?
জোয়ার হুমিনায় ভাটা পুজ্জে সাগরান নীরব ওয়ে বানা কল কল গরি চিগোন চিগোন ঢেউগুনে আদদে আদদে আমারে ঠ্যাঙানে দোই দেগী সিয়ানি তর মনত আগেনি?
বেলান উত্তে সেদিন্যা দেরী গরি আত্তেগরি হুয়ানি হাজে নিলো চিকচিক্যা রোদো ছদক বাজিলো আমা হিয়াত সাগরঅ মুখ্যা যাদে যাদে হদ হুজো মাজারা ফেলেয়েই জোয়ারে সাবি নেজেয়া হোরোলি চরত সিয়ানি তর চোগোত ভাজেনি?
যেত্তমান আত্তেই তল্লোই দুজ্যা পাড়ে পাড়ে আদানা সলাত জোয়ার হুমি যেইনায় হোরোলী চরর মুধ্যাদী চিগোন চিগোন ছড়া নাল আদি যিয়ে সে ছড়ানিত মাছ হাঙারাগুনে হেলা হেলন সেগুন তুই ধুরি ধুরি চেদে মরে ডাগিনে হদে চাগীদে চাগীদে সিয়ানি মনত আগেনি তর?
এস্যা ভালকদিন পরে মত্তুন হিত্তায় মনত উদের সেদিন্য বিন্যা সাগর পাড়ে পাড়ে আদি বেড়েয়া হদানি মন রিবাঙত ফুড়ি উদের তর মনত আগেনি?
হদক মেলোর পর মেইল আদি যিয়েই দাগাদাক্যা গরি দুজ্যা আভা হেই হেই আমা দেজসান এদক হি দোল গান শুনি শুনি তত্তুন সিয়ানি মনত আগেনি?
বিল্যা দিবোরত সাজন্যা অয় সঙ বানা দ্বিজনে সাগর পাড়ত বাদাম বুট চাবে চাবে মন হদা হোই হোই নুনজো পানির সাগরর ঢেউগুন হদক গুন্নেই সিয়ানি তর মনত আগেনি?
থাক্কে থাক্কে আবাদাগুরি এনেই ধুব ধুব ঢেউগুনে আমারে দপাজ গরি ঠেঙানি ধোইদেগী তর হুজি ঠেঙপাদানি চিকচিক্যা রাঙা ওই উদিদো নুনজো পানি ছোয়ালোই সিয়ানি তর এক্কাও চোগোত ভাজেনি?
আদতে আদতে দুজ্যা আভানে ত চুলানি উরে দিদো দ্বিআদ বাড়ে ম মুখ্যা ডুমুরি এদে তুই আগবাড়ে হজা যেদুঙ মুই সিয়ানি তর মনত উদেরনি?
দুজ্যা পাড়ে পাড়ে আদদে সলাত তরে দেগে দিদুঙ মুই ঐ বো চা হুদুঙ রাধামন ধনপুদি মোন্নো তুই আওজে পিজের গরিদে সিয়ত হি গুজ্জোন তারা? মুই হুদুঙ তরে সে মোনো পিদিত রাধামনে ধনপুদিরে দিবোঙসী ফুল্লো পারি দিবার যিয়ে তত্তুন সে হদানি মনত আগেনি?
মনত তুলিজ অত্তে অত্তে যক্কে মরে সবনে দেগীবে
যক্কে মুই তত্তুন দূরত ভালুদ্দুত থেম মনান যক্কে ওলোজোলো অব সক্কে তুই মুরোত পুরি এ বিজগর হদানি মনত তুলিবে মনান হুজিয়ে নাজি উদিবো।
গম থেইজ তুই গম থেইজ তুই আবাদা গরি হনদিন আজি গেলেও মুই মরে পুরি ন ফেলেচ্ তুই পুরি ন ফেলেচ্ তুই।